Ein bankastjóri er ein maður, sum lænir tær eitt regnskjól tá sólin skínur, men tekur tað frá tær aftur, so skjótt tað fer at regna
- Mark Twain
Útlendis ítróttur

Humørliðið Chelsea var í góðum humøri í dag á heimavølli ímóti absolutta botnliðnum Huddersfield Town.

Chelsea tapti 4-0 mikukvøldið á útivølli ímóti Bournemouth, men tað var eingin vandi fyri einari endurtøku, tá Huddersfield kom á vitjan í Vestur London í dag.

Chelsea vann nevniliga heili 5-0, eftir at støðan í hálvleikinum hevði verið 2-0.

Gonzalo Higuain, sum kom frá AC Milan í januar flytingarglugganum, byrjaði á fyrsta sinni inni fyri Chelsea, og fekk hann tvey mál.

Harav var serliga tað seinna málið - tað til 4-0 - ein sonn perla.

Eden Hazard skjeyt eisini tvey mál, meðan David Luiz skjeyt - ella skallaði - tað fimta málið.

Harvið er Chelsea nú aftur nummar fýra í Premier League, trý stig frammanfyri Arsenal og fimm frammanfyri Manchester United á stigatalvuni.

Chelsea hevur við 50 stig fyri 25 dystir, Arsenal hevur 47 stig fyri 24 dystir, meðan Manchester United hevur 45 stig fyri 24 dystir.

Bæði Arsenal og United skuldu í eldin í morgin. Arsenal skal leika á útivølli ímóti meistarunum úr Manchester City, meðan United skal leika á útivølli ímóti fyrrverandi meistarunum úr Leicester City.

Um tú veitst okkurt, sum VP ikki veit - skriva so til vp@vp.fo