Borgarlig og sosialistar eru sum kona og maður. Skilja ikki altíð hvønn annan, men fáa allíkavæl húsarhaldið at hanga saman
- Ókendur
Politikkur

Fyrispurningur eftir Tingskipanini §52a til Høgna Hoydal, landsstýrismann í landbúnaðarmálum, um reglur fyri at ferðast í náttúruni og um hvørsmansrætt

- Hvussu gongst við at gera eina ætlan fyri, hvussu og hvar fólk kunnu ferðast í haga og fjøllum í Føroyum? 

- Hvussu gongst við at útvega greiða heimild til reglur um, um og hvussu gjøld kunnu takast fyri at ferðast í føroysku náttúruni?

- Nær væntar landsstýrismaðurin, at hetta arbeiðið verður liðugt?

- Hvørja hugsan hevur landsstýrismaðurin um verandi gongd, at alt fleiri eigarar og festarar av hagum seta í verk tilvildarligar gjaldsskipanir fyri atgongd til teirra haga?

- Hvat heldur landsstýrismaðurin um at seta í verk hvørsmansrætt í Føroyum?

- Hvat krevst fyri at seta í verk hvørsmansrætt?

Viðmerkingar
Nú er eitt ár liðið, síðani eg setti landsstýrismanninum ein fyrispurning um, hvat hann ætlaði at gera við at fáa greiðari reglur um at ferðast í náttúruni.

Tá svaraði landsstýrismaðurin, at avvarðandi ráð (Fiskimálaráðið, Uttanríkis- og vinnumálaráðið og Heilsu- og Innlendismálaráðið) í longri tíð høvdu samstarvað um at fáa skipað økið, og at ítøkiligt uppskot um at útvega myndugleikunum greiðari heimildir og reglur á økinum skuldi leggjast fyri tingið á heysti 2018.

Tíverri kom umrødda uppskot ikki í tingið.

Hevði hetta málið skund fyri einum ári síðani, er støðan hvaðna verri nú.

Alt títtari frættist, at eigarar og festarar av hagum kring landið taka málið í egnar hendur og áseta tilvildarligar upphæddir fyri atgongd til hesar hagar.

Støðan er als ikki nøktandi og elvir til mikla ørkymlan, bæði hjá føroyingum, sum vanliga ferðast frítt í náttúruni, og hjá teimum, sum fáast við ferðavinnu.

Neyðugt er við eini skipaðari og greiðari ætlan fyri, hvussu vit ferðast, og hvør kann ferðast í haga og fjøllum í Føroyum.

Eisini er tað mín sannføring, at tað eigur at vera hvørsmansrættur við teimum rættindum og skyldum, sum hetta inniber, at føroyingar sleppa at ganga í føroysku náttúruni.

Kristianna Winther Poulsen, tingkvinna
Á løgtingi, 24. juni 2019

Um tú veitst okkurt, sum VP ikki veit - skriva so til vp@vp.fo