Hús gav út sína fyrstu plátu 'Nevember' fyri góðum mánaða síðan á plátufelagnum Kervið. Í kvøld t. 7 desember kl. 21 spælir Hús eina ókeypis útgávukonsert í Tøting í Gøtu, sum Tónleikasamtakið Grót skipar fyri. Umframt Hús spælir Rebekka Petersen eisini.
Í samband við útgávukonsertina letur Hús eisini frá sær eitt nýtt videolag. Høgni Egholm Magnussen hevur gjørt videolagið burtur úr gomlum 8mm bandupptøkum, sum hann fann á loftinum hjá mammubeiggjanum. Samansettu brotbitarnir eru sum eitt sorgblítt ekkó frá eini farnari tíð.
Um Hús
Hús er verkætlan hjá Rólant Lenvig av Reyni, ið eisini er kendur sum guitaristur í rokkorkestrinum Makrel.
Tónleikurin hjá Hús er ein samanrenning av tungum pulserandi rútmum og hypnotiskum guitarriffum. Onkur hevur lýst tónaheimin hjá Hús sum ljóðbandið til ein dreymasekvens í einum Sophia Coppola filmi, meðan tónleikurin samstundis hevur eina myrkari síðu; litað av London, har flestu løgini av 'Nevember' hava sín uppruna.
Um tú veitst okkurt, sum VP ikki veit - skriva so til vp@vp.fo
